ٹمپا (امریکا).(ہمیشہ پاکستان)راولپنڈی، چیف آف آرمی سٹاف فیلڈ مارشل سید عاصم منیرنے امریکا کی سینئر سیاسی اور عسکری قیادت کے ساتھ ملاقاتوں کے دوران دوطرفہ پیشہ ورانہ دلچسپی کے امور پر تبادلہ خیال کیاہے۔اتوار کو آئی ایس پی آرسے جاری بیان کے مطابق چیف آف آرمی سٹاف فیلڈ مارشل سید عاصم منیرنے امریکا کے سرکاری دورے کے دوران امریکا کی سینئر سیاسی اور عسکری قیادت کے ساتھ ساتھ پاکستانی تارکین وطن کے ساتھ بات چیت کی ہے۔
ٹمپا میں فیلڈ مارشل نے سبکدوش ہونے والے کمانڈر یونائیٹڈ سٹیٹس سینٹرل کمانڈ (سینٹ کام)، جنرل مائیکل ای کوریلا کی ریٹائرمنٹ کی تقریب اور ایڈمرل بریڈ کوپر کی کمان سنبھالنے کی تقریب میں شرکت کی۔آرمی چیف نے جنرل کوریلا کی مثالی قیادت اور دوطرفہ فوجی تعاون کو مضبوط بنانے میں ان کی مثالی شراکت کی تعریف کی، اور مشترکہ سیکورٹی چیلنجوں سے نمٹنے کے لیے مسلسل تعاون پر اعتماد کا اظہار کرتے ہوئے، ایڈمرل کوپر کے لیے نیک تمناؤں کا اظہار کیا۔فیلڈ مارشل نے چیئرمین جوائنٹ چیفس آف سٹاف جنرل ڈین کین سے بھی ملاقات کی جس میں باہمی پیشہ وارانہ دلچسپی کے امور پر تبادلہ خیال کیا گیا۔
انہوں نے جنرل کین کو دورہ پاکستان کی دعوت دی۔ اس موقع پر آرمی چیف نے دوست ممالک کے دفاعی سربراہان سے بات چیت کی۔پاکستانی تارکین وطن کے ساتھ ایک انٹرایکٹو سیشن کے دوران بری فوج کے سربراہ نے ان پر زور دیا کہ وہ پاکستان کے روشن مستقبل میں اعتماد رکھیں اور پاکستان میں سرمایہ کاری کی ترغیب دینے میں فعال طور پر حصہ ڈالیں۔ تارکین وطن نے پاکستان کی ترقی اور خوشحالی کے لیے اپنے عزم کا اعادہ کیا۔
