اسلام آباد۔(محمد جنید) وزیراعظم محمد شہباز شریف نے پائلٹ آفیسر راشد منہاس شہید (نشان حیدر) کو 54 ویں برسی پر خراج عقیدت پیش کرتے ہوئے کہا ہے کہ ان کی عظیم قربانی ہمت اور فرض سے لگن کی اعلیٰ روایات کی مظہر ہے، راشد منہاس کا نام قوم کی تاریخ میں ہمیشہ وفاداری، حوصلے اور فخر کی علامت کے طور پر محفوظ رہے گا۔
بدھ کو پی ایم آفس کے میڈیا ونگ سے جاری بیان کے مطابق پائلٹ آفیسر راشد منہاس شہید (نشان حیدر) کی برسی پر اپنے پیغام میں وزیر اعظم نے کہا کہ راشد منہاس کی عظیم قربانی ہمت اور فرض سے لگن کی اعلیٰ روایات کی مظہر ہے، 1971 میں آج کے دن انہوں نے غیر معمولی عزم کا مظاہرہ کرتے ہوئے پاکستان کی خودمختاری کے تحفظ کے لیے جام شہادت نوش کیا۔
وزیر اعظم نے کہا کہ راشد منہاس کا لاجواب جذبہ، وفاداری اور حب الوطنی مسلح افواج اور قوم کے لیے ایک لازوال ترغیب کا باعث ہے، ان کی بہادری کی داستان ہمارے قومی ضمیر کو آزادی کی قیمت اور مادر وطن کے دفاع کے لیے درکار لازوال حوصلے کی یاد دہانی ہے۔انہوں نے کہا کہ پاکستان کی مسلح افواج راشد منہاس کی لازوال میراث کو شاندار خراج تحسین پیش کرتی ہیں ،ان کا نام قوم کی تاریخ میں ہمیشہ وفاداری، حوصلے اور فخر کی علامت کے طور پر محفوظ رہے گا۔
